Nagpahayag og dakong kabalaka ang United Nations migration agency sa nagkadaghang mga tawo nga nalimbongan ug napugos sa pagtrabaho sa mga scam compound o ilegal nga online fraud centers sa pipila ka bahin sa Asya.
Sumala sa International Organization for Migration, liboan ka mga tawo gikan sa kapin 80 ka nasud ang nadani sa maong mga operasyon human malimbongan sa peke nga job advertisements sa social media nga nagsaad og taas nga sweldo ug maayong trabaho.
Nahimutang ang pipila sa pinakadagkong scam compounds sa Myanmar, Cambodia, ug Laos, diin gibanabana nga mokabat sa 300,000 ka mga trabahante ang gigamit sa pagpahigayon og mga online scam batok sa mga biktima, lakip ang mga tigulang sa mga nasod sa Kasadpan.
Apan matud sa IOM, daghan usab sa maong mga trabahante ang biktima sa human trafficking. Sa dihang makaabot na sila sa maong mga lugar, kuhaon ang ilang mga dokumento ug pugson sila sa pagpangilad online pinaagi sa mga hulga ug pisikal nga pagpang-abuso.
Dugang pa sa ahensya, ang mga biktima makasinati usab og pang-abuso, trauma, ug dagkong utang bisan human sila maluwas.
Tungod niini, nanawagan ang IOM sa mga gobyerno sa Asya nga palig-onon ang ilang mga lakang batok sa mga sindikato nga nagpaluyo sa maong ilegal nga mga operasyon.
