Gibutyag sa usa ka Political Analyst nga si Ramon Beleno III nga ang pag-anunsyo ni Vice President Sara Duterte, nga sabay matud pa nga mukandidato isip Senador ang 3 ka mga Duterte alang sa 2025 midterm election ang usa lamang ka pagsulay kung aduna pa ba silay ‘public glamour’.
Kahinumduman nga bag-ohay lamang gibutyag sa bise presidente nga ginakonsidera karon nila Former President Rodrigo Duterte, Davao City 1st District Representative Paolo ‘Pulong’ Duterte, ug Davao City Mayor Sebastian ‘Baste’ Duterte ang pagdagan isip Senador sa nasud.
Sumala pa ni Beleno nga dili katuohan ang pagdagan sa tulo ka mga Duterte tungod sa pipila ka rason.
Una niana mao ang matud pa ‘counter productive’ ang nahisgutang lakang.
Dakong pangutana usab alang kay Beleno kung nganong sa kadaghan og mamahimong daganan, sa pagka senador lamang modagan ang tulo.
Kini gumikan sa Senate o senado, adunay ginatawag nga ‘collective decision’ o naga-desisyon kini sila isip ‘one body’ busa kung madaog man ang tulo, maglisod gihapon sila sa pagdesisyon sanglit gikinahanglan niini ang pag-uyon sa uban pang senador.
Dugang pa sa political analyst, alang sa mga nakaila gayud sa Duterte, mabasa gayud nga estratehiya lamang kini sa mga politicians aron makahatag og kalibog sa ilahang mga kaatbang.
Dugang pa ni Beleno nga kining panahona mao ang season alang sa alignment and realignment.
