GENSAN– Masaligon ang kapulisan nga dili na nila kinahanglan nga i-seal ang mga service firearms sa ilang mga personahe karong kapaskuhan.
Ang naandan nga praktis sa pagbutang og muzzle tape o tape sa buka sa pusil sa mga service firearms sa mga opisyal sa pulis wala na gilakip ni Acting PNP Chief, Police Lt. Gen. Jose Melencio Nartatez Jr. sa iyang memorandum nga gi-isyu alang sa kapaskuhan.
Kini nga desisyon gihimo human sa Inter-Agency Meeting o meeting tali sa lain-laing mga ahensya sa gobyerno, lakip ang Department of the Interior and Local Government (DILG) sa miaging semana.
Kini nga meeting naghisgot sa mga lakang aron masiguro ang seguridad ug kaluwasan sa publiko atol sa kapaskuhan.
Mahinumduman nga ang katapusang higayon nga gipatuman ang estrikto nga pagbutang og tape sa buka sa mga service firearms sa mga pulis niadtong 2023.
Kini nga lakang nagtumong sa pagpugong sa indiscriminate firing labi na sa Bag-ong Tuig, nga kanunay hinungdan sa peligro ug kadaot sa mga sibilyan.
