GENERAL SANTOS CITY – Mas gipahugtan pa karon sa kapulisan ang pagbantay sa seguridad sa matag checkpoint dinhi sa dakbayan.
Matud pa ni PCol. Gilbert Tuzon, ang City PNP Director sa dakbayan tumong niini nga mabantayan ang si kinsa mang musulod sa lugar nga buot mohimo ug kasamok sa malinawon nga probinsiya.
Sa karun gipaa-alerto niini ang tanang Police Station sa GenSan human nga gi-atake ang Datu Piang Maguindanao sa mga miyembro sa Bangsamoro Islamic Freedom Figthers (BIFF) kung asa adunay nahitabong pinusilay tali sa maong grupo ug sa otoridad ug gisunog pa ang police patrol car.
Hinuon, gibutyag ni Tuzon nga walay nadawat nga bahad sa unsa mang grupo ang syudad kini human nahitabo ang pagsulong sa mga sakop sa BIFF didto sa Maguindanao.
Pinasubay sa kamanduan ni PRO 12 Director John Michael Dubria sa mga provincial ug city director sa kapulisan nga triplihon ang pagbantay sa palibut aron dili makahimo ug unsa nga krimen ang mga kaaway.
Gi-awhag ni Tuzon ang katawhan nga tabangan sila pinaagi sa pagreport sa pinakaduol nga kwerpo sa kapulisan kung duna silay makit-an nga mga tawo nga kadudahan ug lihok nga moabot sa ilang mga lugar.
