Mitaho ang Philippine National Police (PNP) nga malinawon ang pag-abli sa mga tulonghaan sa tibuok nasud kagahapon alang sa school year 2025-2026.
Gibutyag ni PNP Chief PGen. Nicolas Torre III nga luwas ug malinawon ang unang adlaw sa pagbalik sa mga tinun-an sa eskwelahan ug nisaad nga dugangan ang police visibility sa mga tulonghaan sa umaabot nga mga adlaw.
Maisip usab nga malampuson ang pag-abri sa mga eskwelahan pinaagi sa tabang sa mga ahensya, lokal nga kagamhanan, kapolisan, magtutudlo, ug bisan sa mga ginikanan.
Gikompirma usab ni Torre nga padayon silang makig-alayon sa mga tulonghaan aron masiguro nga mahatagan og igong proteksyon ang mga tinun-an sa tibuok nasod.
Samtang, padayon ang hugot nga koordinasyon ug dayalogo sa PNP sa Department of Education (DepEd) aron masiguro nga luwas ang mga estudyante sa sulod o bisan sa gawas sa ilang mga kampus.
