GENERAL SANTOS CITY- Adunay mapalit nga mas baratong bugas samtang wala pa miabot dinhi sa nasud ang NFA rice nga giangkat sa gobyerno gikan sa Vietnam og Thailand.
Matud pa ni Rey Dominggo sa Department of Agriculture GenSan nga padayon gihapon ang ilang buhatan sa pagbaligya og bugas human nga gisugdan kini kaniadtong Pebrero human nga gilusad sa ahensiya ang proyektong ‘Bigas ng Masa”.
Sa karon anaa sa P40 hangtud P60 kada kilo ang baligya sa bugas sa palengke apan sa ‘Bigas ng Masa,’ mapalit ang bugas sa P38 kada kilo.
Gibutyag ni Dominggo nga gihangyo ni DA Sec. Manny Piñol ang mga galingan sa Region 12 aron suplayan ug mas baratong bugas ang mga consumers og mga mag-uuma samtang wala pay NFA rice nga miabot sa nasud.
Apan gibutyag ni Dominggo nga tig-singko kilos lang ang pinakadaghan nga puwedeng paliton.
Abli ang opisina sa Department of Agriculture sa Lagao alas 7 sa buntag angtud alas 7 sa gabie.
