GENSAN- Gipahimangnoan ni Binrio Biñan, Chief Weather Observer and Meteorologist ng PAGASA-GenSan ang mga katawhan sa tibuok SOCCSKSARGEN nga mag-amping sa grabe nga kainit sa panahon, ilabi na kadtong direktang nagbulad sa adlaw sama sa mga trabhante ug mga mag-uuma, human sa natalang 41°C heat index sa General Santos City niadtong Abril 23.
Sumala kaniya, delikado ang sobra nga pagkaladlad sa kainit kay mahimo kining hinungdan sa heat stress ug heatstroke nga posibleng moresulta sa komplikasyon o kamatayon, labi na sa mga adunay sakit sama sa hypertension.
Iyang gipatin-aw usab nga ang heat index mao ang gibati sa lawas, busa kung sobra na kini kataas, mahimong makasinati og kalipong, kombulsyon, ug uban pang seryosong kondisyon.
Samtang, nagpagawas usab og pahimangno ang World Meteorological Organization mahitungod sa posibleng pag-abot sa El Niño phenomenon sa sunod bulan, nga gilauman nga makapasamot pa sa kainit sa panahon sa nasud ug sa uban pang bahin sa kalibutan.
Tungod niini, gipahimangno pag-usab ang kahinungdanon sa pag-amping, pag-inom og igo nga tubig, ug paglikay sa taas nga oras nga pagkaladlad sa adlaw.
Gipasiugda ni Binrio nga labi nang kinahanglan magdoble-amping ang mga mag-uuma, construction workers, ug uban pang trabahante nga adlaw-adlaw nga nagbulad sa init sa adlaw aron malikayan ang mga peligro nga dala sa grabe nga kainit.
