Mihinay ang pagtubo sa ekonomiya sa Pilipinas human maitala ang 2.3% nga Gross Domestic Product (GDP) growth sa ikaduhang kwarter sa 2026, base sa datos sa Philippine Statistics Authority (PSA).
Matud ni PSA Chief ug National Statistician Claire Dennis Mapa, mas ubos kini kumpara sa 2.8% nga pagtubo sa unang quarter sa 2026 ug layo usab sa 5.4% nga naitala sa samang panahon niadtong 2025.
Gipasabot sa PSA nga naapektuhan ang dagan sa ekonomiya tungod sa nagkataas nga inflation, epekto sa tensyon sa Middle East, ug paghinay sa mga pamuhunan.
Tungod sa hinay nga pagtubo sa unang unom ka bulan sa tuig, mikabat lamang sa 2.6% ang average economic growth sa unang semestre sa 2026.
Taliwala niini, gipaubos sa gobyerno ang target nga pagtubo sa ekonomiya alang sa tibuok tuig ngadto sa 3.5% hangtod 4.5%.
