GENERAL SANTOS CITY – Nagpaklaro ang kapulisan nga kabahin sa internal cleansing sa tibuok han-ay sa kapulisan sa nasud sa pagpanguna ni PNP Chief Lt. Gen. Camilo Cascolan ang gipahigayong pag-inspeksyon sa gigamit nga sakyanan sa mga pulis sa Campo Lira ning dakbayan.
Matud pa ni P/Col. Gilberto Tuson, Acting City Director sa General Santos City Police Office (GSCPO) nga ang operasyon ang kabahin sa Oplan Kabalikat kung asa gipatuman sa Highway Patrol Group (HPG) og PNP Unit Integrity Monitoring and Enforcement Group.
Sutaon ang mga sakyanan sa kapulisan kung gagamit sa narekober nga sakyanan sa operasyon o mga ebidensya nga angayang nakabutang lang sa evidence room og dili pwedeng gamiton.
Gitan-aw usab kung rehistrado og dili expire ang mga dokumento sa sakyanan apil ang drivers license sa mga pulis.
Gihingusgan ni Tuson, isip tigpatuman sa balaud angayang manguna sa pagsunod sa balaud.
Ang HPG muhatag og clearance sa pulis kung asa dili pwedeng makasulod o makagawas sa Camp Lira kung walay ipakita nga clearance.
