GENERAL SANTOS CITY – Padayong giimbestigahan sa kapulisan ang natigayong pagpusuil-patay sa usa ka 16-anyos nga usa matud pa ka batang sukarap, kagahapon sa udto sa Alunan, Bagsakan sa Brgy Bula ning siyudad.
Kahibaluan nga ang biktima nailhan nga si Anwar Cusain, residente sa Brgy Fatima ning siyudad, ug nagtrabaho isip laborer sa nasampit nga lugar.
Gikabutyag nga riding in tandem ang mipusil sa biktima samtang natulog sa iyang folding bed.
Sa insiyal nga imbestigasyon, gisulod sa gunman ang lawak nga gikahimutangan sa biktima, dayon gipusil sa ibabaw nga bahin sa tuo nga dalunggan, nga milapos sa wala nga bahin sa iyang ulo, nga maoy hinungdan sa iyang hinanaling kamatayon.
Human gihimo ang pagpamusil, paspas matud pa nga migawas ang gunman ug misakay sa puti ug itum nga XRM nga getaway motorcycle, nga gimanehuan sa kauban niyang lookout, dayon paspas nga misibat pagawas sa lugar ug gisubay ang J. Catolico Avenue.
Base sa nakahinabi sa Bombo Radyo nga mga residente sa lugar, ang biktima usa ka ilado nga siga sa lugar, nga kanunay’ng malambigit ug matudlo nga nagpaluyo sa mga gakahitabo nga rambol ug riot sa ilang lugar.
