Gisuspenso sa Department of Agriculture o DA ang pag-export sa hilaw nga ube o purple yam tungod sa nagkadakong panginahanglan niini sa gawas sa nasud ug kakulang sa suplay sa planting materials sa Pilipinas.
Matud sa DA, ang suspension nga gipagawas sa Bureau of Plant Industry niadtong miaging bulan naglangkob sa preskong ube ug mga materyales nga gamiton alang sa pagtanom, bisan pa kung kini alang sa konsumo, pagtanom o panukiduki.
Gipatin-aw ni Agriculture Secretary Francisco Tiu Laurel Jr. nga tumong niini nga mapabilin sa Pilipinas ang mga materyales nga pangtanom samtang gipadako pa ang kapasidad sa lokal nga industriya sa ube.
Matud pa niya, kulang mismo ang nasud sa planting materials ug dili gusto sa gobyerno nga ma-export kini ngadto sa ubang nasud nga posibleng mogamit sa mga barayti sa ube sa Pilipinas aron makigkompetensya sa merkado.
Sumala sa DA, mas paspas ang pagtaas sa popularidad sa ube kaysa sa kapasidad sa Pilipinas sa pagprodyus niini, hinungdan nga gisuportahan niini ang mga programa sama sa tissue culture, community-based nurseries ug mini-set propagation aron madugangan ang suplay sa pagtanom.
Gipahibalo usab nga adunay mga proyekto ug pondo nga gitagana alang sa pagpalambo sa industriya, samtang natukod na usab ang United Ube PH Association Inc. nga naglangkob sa mga mag-uuma, kooperatiba, growers, processors, traders, exporters, researchers, academe ug mga ahensya sa gobyerno.
