GENERAL SANTOS CITY – Aprobado na sa Committee on Ways and Means sa kamara ang sugyot balaodnon nga i-convert ang Mindanao State University (MSU) – College of Medicine Extension sa Regular College of Medicine Program sa MSU-Gensan campus lakip ang pagbutang sa kaugalingong pundo.
Natigayon ang pipila ka oras nga deliberasyon ug diskusyon sa miaging Marso 15, 2021 kung asa si Rep. Shirlyn Bañas Nograles ang nagduso sa maong sugyot balaodnon.
Ang usa sa mga gitutukan sa committee hearing ang kabahin sa section 11 ang kalabutan sa tax exemptions susama sa Custom duties ug Donor’s tax sa MSU College of Medicine.
Lakip nga mitambong sa pagdungog sa maong komitiba ang pipila ka opisyal sa MSU- Gensan College Campus sa pagpanguna ni Chancellor Anshari Ali.
Matud ni Nograles nga gusto nga mahimong independente ang MSU GenSan College of Medicine aron makadesisyon gilayon sa plano og may kaugaliingong pondo aron dili magsalig sa ilang main campus.
Ang MSU GenSan College of Medicine nahimutang sa MSU high school department nga naa lamang sa sentro sa syudad.
