Nagtuo ang kampo ni Vice President Sara Duterte nga posibleng mapamubo ang impeachment trial kung pormal nang bawion o i-drop sa prosecution panel ang Article 3, nga naghisgot sa mga alegasyon sa panunuhol o bribery sa mga opisyal sa Department of Education.
Sumala kang Defense Deputy Spokesperson Atty. Justin Nicol Gular, naghulat pa ang ilang kampo sa pinal nga desisyon sa prosecution kung bawion, ipadayon o ipadayon gihapon ang maong Article 3, sa dili pa sila magpagawas og dugang nga opisyal nga pahayag.
Matud ni Gular, respetuhon sa depensa ang bisan unsang desisyon sa prosecution ug andam silang i-adjust ang ilang legal nga pagpangandam base sa mahimong desisyon.
Abli usab ang kampo sa Bise Presidente sa mga stipulation o mga kasabutan sa pipila ka kamatuoran ug ebidensya nga mahimong ipresentar sa prosecution. Apan kinahanglan pa nila kining susihon ug tun-an pag-ayo sa dili pa sila mohatag og opisyal nga tubag.
Gipasalig usab sa legal team nga andam sila sa mas taas nga mga hearing, lakip na ang tibuok adlaw nga mga sesyon, aron makasunod sa busy nga iskedyul sa Senado.
Matud ni Gular, apil sa ilang preparasyon dili lamang ang legal nga mga aspeto ug mga dokumento, kondili usab ang pisikal ug mental nga pagpangandam alang sa taas nga proseso sa impeachment trial.
