Magsugod na karong Hulyo 7 ang ‘bidding’ alang sa paglakip sa ‘mental health concerns’ sa mga butang nga tubagon sa mga otoridad pinaagi sa pagtawag sa 911 emergency hotline.
Kini gipahibalo ni Department of Interior and Local Government (DILG) Secretary Jonvic Remulla human sa inisyal nga imbestigasyon sa mga imbestigador nga posibleng ‘suicide’ ang hinungdan sa pagkawala sa usa ka ‘law student’.
Matod pa ni Remulla, aduna na silay mga counselors nga andam makig-istorya sa publiko, ilabi na sa mga batan-on.
Kung adunay gibati o problema, mahimo na silang motawag sa 911 aron dali silang matabangan sa mga ‘trained professionals’ gikan sa National Center of Mental Health nga kabahin na sa serbisyo sa 911.
Dugang pa niini, dili na lang krimen o uban pang mga kasagarang emergency ang tubagon sa hotline, kundili lakip na usab ang mga ‘mental health issue’s.
Gisiguro usab ni Remulla nga taas ang interes sa ‘bidding’ para sa pag-apil sa mental health concerns sa serbisyo sa 911.
Matod niini, human sa bidding, mahimong ‘operational’ na ang maong serbisyo sa ikaduhang semana sa Agosto o unang semana sa Setyembre.
Samtang, gawas sa pagtubag sa mga krimen, sunog, ug uban pang klase sa emerhensya, gilauman nga mas epektibo na usab ang pagtubag sa mental health concerns sa publiko pinaagi sa mas gipakusgan nga 911 emergency hotline.
