Gikonsiderar sa mga awtoridad sa Germany nga usa ka terrorist attack nga adunay giingong kalambigitan sa Islamist extremism ang insidente diin giararo sa sakyanan ang mga tawo atol sa Pride event sa Berlin.
Nahitabo ang insidente duol sa lugar diin gihimo ang Christopher Street Day, usa sa labing dagkong LGBTQ Pride events sa Europa.
Usa ka tawo ang namatay samtang 30 ang nasamdan human gisulod sa usa ka puti nga minivan ang Tiergarten Park duol sa Brandenburg Gate sa Berlin niadtong Sabado sa gabii.
Sa mga nasamdan, walo ang nakaangkon og grabeng kadaot, samtang tulo ang anaa sa kritikal nga kahimtang. Giila ang suspek nga si Abdul B., usa ka German citizen nga adunay Lebanese nga kagikan.
Sumala sa mga imbestigador, bag-o pa siyang nakagawas gikan sa juvenile detention duha ka bulan sa wala pa ang insidente ug kaniadto nang gimonitor sa domestic intelligence tungod sa giingong posible niyang koneksiyon sa Islamic State group.
Matud pa sa Berlin police, padayon pa ang pagpangita sa suspek ug gipasidan-an ang publiko nga dili kini duolon tungod kay posible kining armado ug delikado.
Nagpadayon usab ang imbestigasyon aron masayran kung nag-inusara ba ang suspek o adunay mga kauban, human sa pahayag sa pulisya nga posible adunay labaw sa usa ka tawo ang mikanaog gikan sa maong sakyanan.
Samtang, gipasalig sa Germany nga papanubagon ang mga responsable sa maong pag-atake, ug giingong hisgutan usab ang posible nga pagpalig-on sa mga polisiya bahin sa immigration.
