GENERAL SANTOS CITY- Nagdala og paglaum sa tanan nga mahuman ang nasinatian nga paglisod tungod sa coronavirus disease 2019 ang pag-abot sa Sinovac vaccine o unsa pa man nga bakuna.
Kini ang nahimong pamahayag ni Dr. Bing Aquino sa pakighinabi sa Bombo Radyo.
Gipasabot niini ang tumong sa himuong pagbakuna aron makab-ot ang ‘herd immunity’ kung asa daghang ihap sa mga tawo ang angayang mabakunahan aron protektado batok sa COVID 19 nga mahinongdanon aron malikayan ang pagdaghan pa sa mga magsakit o mapugngan ang transmission sa virus.
Gihingusgan ni Dr. Aquino nga lahi nga kaso ang Dengvaxia scare nga nahitabo kaniadto hinungdan nga dili angayang mahadlok sa COVID 19 vaccine.
Sumala pa niini, sa karon anaa kita sa emerhensya nga sitwasyon tungod sa nasinatian ang pandemya gumikan sa coronavirus disease.
Gihisusama ni Dr. Aquino ang kaugalingon nga angayang responsable tungod matag adlaw gaatubang sa mga pasyente. Susama sa pagpahigayon ug Dugong Bombo ug Bombo Medico, sumala pa niini nga kinahanglang masusi sa usa ka doktor ang matag health care worker ug makuhaan ug vital statistics una bakunahan.
Sa pamahayag pa ni Dr. Aquino, excited na siya sa vaccination program ugmang adlawa.
