Gilauman sa Pilipinas ang pagsaka sa gidaghanon sa mga turistang Ruso nga mobisita sa nasud human daghang mga airline sa Russia ang mihangyo nga maglunsad og direktang mga biyahe gikan sa Russia ngadto sa mga dagkong destinasyon sa turismo sa Pilipinas.
Sa usa ka interbyu uban ni Philippine Ambassador to Russia Igor Garlit Bailen sa Kazan, Russia niadtong Martes, si PCO Undersecretary ug Palace Press Officer Claire Castro miingon nga ang mga turistang Ruso interesado sa mga destinasyon sa turista sa nasud.
Gi-interbyu ni Castro si Bailen sa Kazan, diin kauban niya si Presidente Ferdinand R. Marcos Jr. nga mitambong sa ASEAN-Russia Commemorative Summit.
Sumala ni Bailen, sa miaging tuig, ang Russian airline nga IrAero nagsugod sa pag-charter og mga biyahe paingon sa Kalibo, Aklan gikan sa mga siyudad sa Irkutsk ug Khabarovsk sa silangang Siberia.
Giingon usab ni Bailen nga gilauman nila nga daghang direktang mga biyahe gikan sa ubang mga airline ang ilunsad aron daghang mga turistang Ruso ang makabisita sa Pilipinas ug makasinati sa talagsaon nga pagkamaabiabihon sa mga Pilipino, samtang gipalapdan sa nasud ang mga tinubdan sa mga langyaw nga turista lapas sa China, South Korea, ug Estados Unidos.
Sumala ni Bailen, dako ang interes sa mga Ruso nga mobisita sa Pilipinas, ug importante nga mas daghan pa ang moanhi tungod sa dakong kontribusyon niini sa sektor sa turismo.
Dugang niya nga ang Thailand, Indonesia, ug Vietnam lakip sa mga nag-unang destinasyon para sa mga turistang Ruso sa mga nasod nga miyembro sa ASEAN.
