GENERAL SANTOS CITY – Daghan ang nakadayeg sa nagkatag nga hulagway sa internet ang bag-ong panagway sa General Santos City Airport.
Gibutyag nga anaa na sa 95% nga nahuman ang maong airport.
Kini human namatikdan ang taas nga atop sa gambalay nga makita bisan sa layo nga distansiya.
Sa mga hulagway makit-an ang lapad nga pasilyo, daghang bangko sa departure area ug ang x-ray machine nga mususi sa mga bagahe.
Makita usab ang port terminal nga hunungan sa mga eroplano aron direkta na ang mga pasahero sa arrival area nga dili na muagi sa tarmac.
Kahinumduman nga makadaghan nga gipatawag sa konseho ning syudad ang opisyal sa Civil Aviation Authoriry (CAAP) ug ang contructor aron pangayu-an ug pagpaklaro nganong hilabihan kadugay nahuman ang Gensan airport.
Rason sa contructor nga may kalangan nga nasinati-an tungod sa China pa gikuha ang mga puthaw nga gitaod sa pagpatukod sa bag-ong building oig nagdugang pa ang pandemic.
Gibutyag nga anaa sa P1 billion ang gigahin nga pondo sa maong proyekto.
