GENSAN- Gihangyo ni General Santos City Councilor Richard Atendido ang padayong presensya sa mga traffic enforcer sa mga dalan paingon sa public market, ilabina sa Bagsakan area ug gikan sa Safi, Magsaysay Ave., aron malikayan ang pagsamot sa trapiko.
Kini human nga adunay mga reklamo gikan sa publiko nga usahay walay makita nga traffic enforcer sa maong lugar, ilabina sa hapon, diin kasagarang bation ang paghuot sa trapiko.
Matud ni Atendido, posibleng mahitabo ang pagkawala sa traffic enforcer panahon sa pag-baylo sa duty. Gihangyo usab niini ang Public Safety Office o PSO nga masiguro nga adunay mopuli dayon sa traffic enforcer nga mohawa sa duty aron dili mabakante ang lugar panahon sa pag-change of duty.
Dugang pa sa konsehal, bisan pa man og one-way ang maong dalan, mahimong mosamot ang paghuot sa trapiko tungod sa mga sakyanan nga nagparking o naghunong aron mosakay ug monaog ang mga pasahero sa mga lugar nga dili angay hunongan.
Giawhag usab ni Atendido ang mga motorista ug publiko nga magpakita og gamayng disiplina sa paggamit sa dalan aron malikayan ang trapiko ug mas hapsay ang dagan sa mga sakyanan paingon sa Central Public Market.
