GENSAN –Gipahayag ni Congresswoman Shirlyn Bañas-Nograles nga padayon ug husto nga ginahuman ang Mabuhay Underpass human sa miting uban ni Dr. Alan Botoyan, mga eksperto sa QSTI, DPWH, ug Vicente T. Lao Construction aron repasohon ang resulta sa komprehensibong technical studies.
Diin gipadayag nga gigamitan ang proyekto og Electrical Resistivity Tomography o murag “MRI” sa yuta aron masuta ang agas sa tubig sa ilalom.
Samtang 20 ka boreholes nga adunay giladmon nga 15 hangtod 30 metros ang gihimo aron ma-monitor ang water table sa palibot, lakip na ang plano sa pagtukod og dakong detention reservoir nga may sukod nga 50 metros ang gitas-on ug 12 metros ang gilapdon nga makapugong og 1,500 cubic meters sa tubig.
Sumala pa kaniya, kini nga sistema gidisenyo nga molungtad og 100 ngadto sa 150 ka tuig, bisan kon adunay hingpit nga pagkawala sa kuryente sa lugar.
Gisiguro usab niya nga ang pondo sa gobyerno magamit sa de-kalidad ug lig-on nga proyekto alang sa katawhan.
