GENERAL SANTOS CITY – Giklaro ni Sen. Manny Pacquiao nga kinahanglan pa nilang hisgutan ni Coach Buboy Fernandez ang mamahimo nilang setup sa mga musunod nga away niya.
Kini human nga may bag-o nang responsibilidad si Fernandez human midaog sa pagka-vice mayor sa Polangui, Albay sa nakalabay’ng piniliay.
Kahinumduman nga human sa iyang pagboto, atul sa interview, giangkon sa fighting senator nga ang suod nga higala nga si Coach Buboy gihapon ang maoy manguna sa iyang training camp alang sa umaabot nga away kang Keith Thurman sa July 20.
Lauman nga makauban usab nila si Coach Freddie Roach.
Sumala pa nga sa Hulyo pa man magsugod ang paglingkod ni Buboy sa bag-ong pangatungdanan hinungdan nga may paigong panahon pa sila aron himuon ang pagbansay aron mapangandaman ug maayo ang umaabot nga away.
Ang rason usab nganong gitakda niya sa Mayo ang sunod nga away tungod may trabaho usab siya sa Senado nga kinahanglan niyang tutukan gumikan mao kini ang iyang responsibilidad ug gipanumpaan sa katawhan.
Hinungdan nga sa Kauluhan niya ablehan ang training camp tungod magsugod usab ang sesyon sa May 20 hangtod sa unang semana sa Hunyo. Human niini, paabuton na lamang nila ang SONA sa pangulo dayon makabansay na ug insakto.
