GENERAL SANTOS CITY – Nagkantiyawanay silang WBA welterweight champion ug Sen. Manny Pacquiao ug American boxer Adrien Broner sa natigayon nga press conference sa Waldorf Astoria Beverly Hills sa Los Angeles alang sa gikatakda nilang away sa Enero sunod tuig.
Sa pakighinabi sa Bombo Radyo GenSan kang Atty Franklin Gacal, kanhing legal counsel ni Pacquiao, gipasigarbo matud pa ni Broner nga iyang pildihon ang fighting senator.
Gitubag usab kini ni Pacquiao sa pagkanayon nga mas paspas diay ang baba sa American boxer kaysa sa mga kinumo niini.
Aminado usab ang Pambansang Kamao nga dili basta-bastang kalaban si Broner, apan kinahanglan una niining magpa-slim gumikan medyo tambok pa aron muaway.
Samantala, karon gikatakda matud pang mupailawom sa medical check-up ang duruha, na required alang sa umaabot nilang away.
Kahibaluan nga mainitong gidawat sa mga Amerikano si Pacquiao sa subli niining pagbalik alang sa gikatakdang away nga matigayon sa MGM Grand Arena sa January 19.
Dugang pa Atty Gacal, tataw ang paghinam-hinam sa mga Amerikano nga subling masaksihan nga makigsangka sa ilang nasud ang Pinoy boxing champ.
