GENERAL SANTOS CITY – Naghinam-hinam na si WBA welterweight champion ug Sen. Manny Pacquiao nga makaatbang ibabaw sa ring si Adrien Broner.
Kini ang gibutyag ni Head Coach Buboy Fernandez nga suod usab nga higala sa fighting senator.
Sa gipahigayong media workout, gibutyag ni Buboy nga daw sa naburyong na si Manny ug buot nang mahitabo ang away karon o sa labing daling panahon.
Una nang giangkon ni Buboy nga nakab-ot na ni Manny ang peak sa iyang training ug gikunhuran na karon ang lebel sa training aron dili ma-burnout.
Sa karon, wala matud pay nakita nga problema ang Team Pacquiao tungod nahimo na matud pa nila ang buot nilang makab-ot sa insaktong panahon.
Apan medyo naburyong na matud pa ang fighting senator sa lighter training hinungdan nga daw sa dili na makahulat ug gapangatol na nga makaatbang si Broner.
Samtang, gipadaplin una ni Sen. Pacquiao ang mga huhungihong kalabot sa plano nga magpapili sa pagka-presidente sa nasud.
Dungan sa iyang media workout sa Wildcard Gym sa Hollywood, gihingusgan sa fighting senator nga wala siyay laing focus karon kundi ang gapahupos nang panahon sa iyang boxing career.
Kahibaluan nga makapila ka higayon nang naintriga si Pacquiao alang sa posibleng presidential bid.
Apan matud sa Pinoy ring icon, wala una niya ginahuna-huna ang iyang mga future political aspirations tungod nakatutok pa siya sa umaabot nga pagdepensa sa World Boxing Association regular welterweight title batok kay Adrien Broner sa Enero 20 sa MGM Grand Garden Arena sa Las Vegas, Nevada.
Samtang, nanghinaot usab matud pa si Pacquiao nga makalingkawas na si Broner sa mga giatubang niining problema partikular na ang mga legal issues niini, dungan sa iyang pagpanmgandam sa ilang umaabot nga away.
Kini human nagpadayag ug kabalaka si Pacman alang sa kalaban, ug gaampo nga dili kini mahimong distraction alang kang Broner.
