GENERAL SANTOS CITY – Gidugangan pa ug duha ka rounds ang sparring sessions nga gihimo ni eight division world champion ug Sen. Manny Pacquiao.
Kagahapon sa hapon, walo ka rounds sa sparring sessions ang gipahigayon ni Pacquiao, kung asa nakadayeg matud pa si Head Coach Buboy Fernandez sa gipakitang paspas nga development sa fighting senator.
Ug gani, anaa na matud pa sa 80 percent ang kondisyon ni Pacman.
Giangkon usab sa iyang mga spar mates, apil na ang Pinoy coach, nga nakasinati sila ug pagpanakit sa kalawasan, gumikan sa kakusog sa mga kinumo ni Pacquiao.
Sa karon, usa matud pa sa mga ginatutukan sa Team Pacquiao mao ang pagpalig-on sa mga tuhod ni Pacman, aron mahimong makasugakod ug makadugay sa away batok kang Lucas Matthyse sa Hulyo 15.
