GENERAL SANTOS CITY – One hundred percent nang andam ug kondisyon si eight division world champion Manny Pacquiao alang sa nagkaduol nga away nila ni Jeff Horn sa Hulyo 2.
Kini ang gikumpirma ni assistant trainer Buboy Fernandez, sa eksklusibong pakighinabi sa Bombo Radyo.
Kagahapong adlawa, 10 ka rounds sa sparring ang gipahigayon sa fighting senator, kung asa tig-tulo ka rounds sa Pinoy boxer nga si Sonny Katiandagho ug Australian nga si George Kambosos Jr., samtang upat kang Mexican Adrian Young.
Matud ni Buboy, human makab-ot ni Pacquiao ang peak, paubos na ang ilang training ug kinahanglan na lamang kining imintina, hangtod sa mismong adlaw sa away.
Mibalibad usab si Buboy nga maghatag ug fearless forecast sa umaabot nga Pacquiao-Horn bout.
Ang mahinungdanon ug target lamang matud pa nila nga makauli dinhi sa nasud mga dala gihapon ang korona.
Samtang, naghatag usab ug detalye si Fernandez kalabot sa umaabot nilang biyahe sa Hunyo 24.
Sumala pa nga mikuha na sila ug direct flight gikan sa Gensan diretso sa Brisbane, Australia.
Musakay matud pa ang entourage ni Pacquiao sa eroplano nga may kapasidad nga 300 ka pasahero.
Samtang, gilauman matud pa nga dili na malisdan sa pag-adjust sa klima ang fighting senator pag-abot sa Australia.
Matud ni Buboy, ginapakusgan nila ang aircon sa Wild Card Gym dinhi sa siyudad, aron maanad si Pacquiao sa katugnaw.
