SARANGANI- Gipangunahan ni kanhi Senador Manny Pacquiao ang ribbon cutting ug turn-over ceremony sa Pacman Village nga nahimutang sa Barangay Bacagay, lungsod sa Alabel, probinsya sa Sarangani kagahapong adlawa
Kapin o kulang 250 ka mga kabalayan ang malampusong gihatag ngadto sa mga benepisyaryo isip kabahin sa housing project nga gitukod aron makatabang sa mga pamilyang nanginahanglan og permanente ug luwas nga kapuy-an.
Dako ang kalipay ug pasalamat sa mga nakadawat sa maong pabahay, diin daghan ang mitulo ang luha samtang gidawat nila ang yawe sa ilang bag-ong panimalay.
Sumala sa kanhi senador, tumong sa proyekto nga mahatagan og paglaum ug bag-ong sinugdanan ang mga kabus ug walay kaugalingong balay. Iyang gipahayag nga ang maong housing project dili lamang simpleng mga estruktura kondili simbolo sa pag-atiman ug paghatag bili sa komunidad.
Gipasalamatan usab ni Pacquiao ang mga kauban sa proyekto ug ang lokal nga panggamhanan sa Alabel sa ilang kooperasyon aron malampuson nga matuman ang maong programa.
Nagpasalig siya nga magpadayon ang iyang mga inisyatibo alang sa kaayohan sa katawhan sa Sarangani ug sa tibuok rehiyon.
Ang turn-over ceremony nahimong makasaysayanong higayon alang sa mga benepisyaryo nga dugay nang nagdamgo nga makabaton og kaugalingong panimalay, ug karon nahimong tinuod pinaagi sa Pacman Village housing project.
