Posibleng moabot sa P8 kada litro ang rollback sa presyo sa mga produktong petrolyo sunod semana kung magpadayon hangtod Biyernes ang dakong pagkunhod sa presyo sa krudo sa internasyonal nga merkado.
Matud ni Department of Energy-Oil Industry Management Bureau Director Rino Abad, miabot na sa kapin $17 ang pagkunhod sa presyo sa diesel sa milabay nga tulo ka adlaw sa patigayon.
Matud ni Abad, usa sa mga hinungdan niini mao ang pahibalo sa Saudi Arabia nga magpadayon kini sa pagkarga og 14 milyon ka bariles nga krudo, nga nagpakita nga magpadayon ang suplay niini ngadto sa mga ‘buyers’.
Una nang misaka ang presyo sa mga produktong petrol tungod sa pag-atake sa Houthi rebels sa Saudi Arabia ug sa tensiyon sa Red Sea.
Samtang, gipahayag sa Department of Energy nga igo ang suplay sa petrolyo sa nasud, diin ang ‘national average inventory’ mokabat sa kapin 53 ka adlaw.
