GENERAL SANTOS CITY – Mukabat sa setenta y singko mil pesos ang kantidad sa druga ang nakuha sa mga sakop sa Philippine Drug Enforcement Agency sa panimalay sa usa ka van driver nga naa sa target list sa otoridad.
Gipaklaro ni Kat Abad, tigpamaba sa PDEA 12 nga nakadagan ang suspek human midagan sa likod nga bahin ang suspek. Gabii dihang misulod ang mga sakop sa drug enforcement unit sa panimalay sa nagpangalan ug Almer Constantino 26 anyos residente sa Purok Waling-waling, Malandag, Malungon Sarangani Province.
Nakamatngon matud pa ang suspek dihang mahatag na ang usa ka dakong sachet nga adunay market value nga banyte mil pesos dayon dagan sa mangitngit nga bahin sa gipuy-an.
Gipaklaro ni Abad nga Dihang gisulod na sa mga operatiba ang panimalay sa suspek nakuha ang laing duha ka dagkong putos sa druga nga nagkantidad ug singkwenta mil pesos.
Kahinumduman miaging bulan nasikop sa maong dapit ang kauban ni Constantino nga tigpayuhot sa gidili nga druga sa Malandag ug sa Malungon.
Matud pa sa PDEA nga kasuhan sa regular filling ang suspek ug maghulat na lamang sa paggawas sa warrant of arrest niini aron gamiton sa pagdakop sa nahisgutan.
