Gisugyot sa gobyerno ang P7.2 trilyon nga nasudnong badyet alang sa 2027, nga mas taas og unom ka porsiyento kumpara sa P6.793 trilyon nga pondo karong tuiga, bisan pa sa pagkunhod sa target sa pagtubo sa ekonomiya ug gipaabot nga kita sa gobyerno.
Sumala sa Department of Budget and Management (DBM), limitado ang fiscal space sa nasud tungod sa mga awtomatikong gasto sama sa National Tax Allotment, pagbayad sa utang, ug uban pang obligadong paggasto.
Giingon usab sa DBM nga naapektuhan ang pag-andam sa badyet tungod sa giingong mga iregularidad sa flood control projects, ingon man sa tensiyon tali sa Estados Unidos, Israel ug Iran, ug sa hulga sa El Niño ug climate change nga nakaapekto sa ekonomiya ug sa kapasidad sa gobyerno sa pagkab-ot sa mga target sa kita ug pagtubo.
Tungod niini, gipaubos sa Development Budget Coordination Committee (DBCC) ang target sa economic growth alang karong tuiga ngadto sa 3.5% hangtod 4.5%, gikan sa una nga 5% hangtod 6%, human mitubo lamang og 2.8% ang ekonomiya sa nasud sa unang quarter, nga maoy pinakahinay nga pagtubo sulod sa miaging lima ka tuig.
