Madugangan og P42 ang minimum wage sa kapin 337,476 ka trabahante sa pribadong sektor sa Central Visayas human giaprobahan sa National Wages and Productivity Commission o NWPC ang wage order alang sa rehiyon.
Sumala sa Department of Labor and Employment o DOLE, mahimong epektibo ang bag-ong minimum wage rates sa Oktubre 14.
Ubos sa bag-ong wage order, mahimong P582 kada adlaw ang minimum wage sa mga trabahante sa mga lugar nga sakop sa Class A, samtang P542 kada adlaw sa mga lugar nga sakop sa Class B.
Sakop sa wage increase ang mga trabahante sa pribadong sektor sa Cebu, Bohol, Negros Oriental ug Siquijor.
Giaprobahan sa NWPC ang wage order atol sa deliberasyon niini sa DOLE Regional Office VII sa Cebu niadtong Setyembre 26, diin lima ka commissioner ang mitambong ug nagkahiusa sa deliberasyon, samtang duha ang wala makatambong.
Sa wala pa kini, gisumite sa Regional Tripartite Wages and Productivity Board VII ngadto sa NWPC ang wage order alang sa pagrepaso ug pag-apruba.
Gipahigayon sa RTWPB VII ang mga konsultasyon ug public hearings uban sa mga representante sa mga trabahante, management ug uban pang stakeholder sa Central Visayas isip bahin sa proseso sa pagtino sa bag-ong minimum wage.
Human sa pag-apruba sa NWPC, ipatik na sa Regional Board ang wage order subay sa mga gilatid nga balaod sa dili pa kini ipatuman sa Oktubre 14.
