Niabot na sa sa P4.8 bilyon ang kinatibuk-ang kantidad sa mga kabtangan nga nabawi ug na-freeze nga may kalabotan sa giingong mga anomaliya sa flood control projects , sumala sa Independent Commission for Infrastructure (ICI).
Sa usa ka interbyu, ang tsirman sa ICI Technical Working Group for Asset Recovery nga si Renato “Aboy” Paraiso miingon nga kini labaw pa sa doble sa miaging report nga P2.1 bilyon.
Sumala ni Paraiso, gipalapdan sa komisyon ang imbestigasyon niini aron mas klaro na ang gilapdon sa mga kabtangan nga mahimong mabawi o ma-freeze.
Dugang niya nga aduna pa’y daghang mga kabtangan kansang kantidad wala pa mabanabana, lakip ang bag-ong nailhan nga mga kabtangan sa kadagatan nga karon gisusi sa Anti-Money Laundering Council (AMLC).
Si Paraiso miingon usab nga ang Maritime Industry Authority (Marina) nakarehistro og 26 ka mga sakyanan sa tubig nga iyang giingon nga giproseso alang sa pag-freeze.
Kagahapong adlawa, gisumite sa ICI sa Office of the President ang 125 ka adlaw nga report niini, nga naglangkob sa mga nahimo sa komisyon sukad sa pagsugod niini niadtong Septyembre 2025.
