Gikumpirma ni Dr. Bong Dacera, sa City Disaster Risk Reduction and Management Office kon CDRRMO nga gawas sa mga food packs walay nahatag na nga hinabang ang syudad sa mga nasunugan sa Saeg Calumpang ning dakbayan.
Matud pa ni Dr. Dacera nga kini gumikan nahurot na ang kapin sa P35 million nga calamity fund gumikan sa COVID response.
Luyo kini nga nagdeklara ang Barangay Calumpang og state of calamity gumikan sa maong sunog.
Nasayran nga adunay mga hinabang nga gihatag ang national agencies sa mga nasunugan gawas pa sa mga pribadong sektor gikan sa BARMM, Lanao og kasikbit nga mga lugar.
Gibutyag ni Dr. Dacera nga adunay 50 ka pamilya ang nahibilin sa Romana Acharon Elementary School kung asa ang uban ang nakaarkila na og balay og adunay mibalik sa Saeg.
Nasayran nga kapin sa 500 ka pamilya ang apektado sa sunog sa miaging November 3, 2021.
Gibutyag nga walay mahatag nga relocation site ang lokal nga gobyerno sa mga nasampit og ang maong area ang usa ka pribadong yuta.
