Gimando ni Presidente Ferdinand “Bongbong” Marcos Jr. ang pagpagawas sa kinatibuk-ang P321 milyon nga pondo para sa 34 ka probinsya ug walo ka siyudad nga naguba sa Bagyong Basyang ug sa iyang shear line.
Ang direktiba gipadala kang Executive Secretary Ralph G. Recto, kinsa mipasalig sa paspas nga pagpagawas sa pinansyal nga tabang ngadto sa mga apektadong local government units (LGUs).
Sumala sa Presidente, ang bag-ohay lang nga grabeng mga panghitabo sa panahon nakapahinabog daghang pagbakwit, pagkamatay sa labing menos 12 ka tawo sumala sa Office of Civil Defense, ug grabeng kadaot sa imprastraktura.
Si Recto miingon nga ang pondo gamiton para sa rehabilitasyon sa mga nadaot nga istruktura ug tabang sa mga residente nga nawad-an og pinuy-anan.
Kini kabahin sa inisyatibo sa Presidente aron mapadali ang pagbangon sa mga komunidad gikan sa mga kalamidad.
Lakip sa mga probinsya nga makadawat og tabang mao ang Surigao del Sur, Surigao del Norte, Dinagat Islands, Agusan del Norte, Agusan del Sur, Misamis Oriental, Misamis Occidental, Lanao del Norte, Davao de Oro, Davao del Norte, Bukidnon, Camiguin, ug Zamboanga del Norte.
Sa Visayas, Negros Oriental, Negros Occidental, Bohol, Capiz, Aklan, Leyte, Cebu, Iloilo, Eastern Samar, Southern Leyte, Antique, Siquijor, Samar, ug Northern Samar.
Sa Luzon, Catanduanes, Camarines Sur, Sorsogon, Masbate, Camarines Norte, Occidental Mindoro, ug Oriental Mindoro.
Ang walo ka siyudad nga makadawat og hinabang mao ang Iligan, Cagayan de Oro, Bacolod, Butuan, Cebu City, Zamboanga City, Iloilo City, ug Mandaue City.
Gawas sa pundo, ang PBBM mimando usab ug dagkong river clearing operations ug flood mitigation measures aron malikayan ang umaabot nga pagbaha.
Sa samang higayon, gipangunahan usab sa Presidente ang pagpirma sa Memorandum of Agreement (MOA) tali sa Departamento sa Edukasyon ug mga LGU sa probinsiya alang sa usa ka massive classroom building program sa tibuok nasud.
