GENERAL SANTOS CITY -Nagpaklaro si Kag. Dominador Lagare, chairperson sa committee on transportation sa konseho kalabotan sa P15.00 nga giuyunan sa Motorized Tricycle Franchising and Regulatory Board (MTFRB) nga minimum nga pamasahe sa traysikel sa dakbayan.
Matud niini, ang singil nga P15 alang sa unang upat ka kilometro nga dagan sa traysikel samtang dugang P1 sa sunod kilometro.
Apan alang sa mga senior citizens, PWDs, og estudyante anaa lang sa P12 ang singil.
Gibutyag niini nga dili pa dayon kini mapatuman tungod kinahanglan pang aprubahan sa Konseho kung asa magbalik sa ilang sesyon sa Enero 2023 pa.
Kung maaprubahan na, gilayong magpagawas og bag-ong kopya sa fare matrix aron mao nay basehanan sa riding public og drivers.
Kalabot sa mga drivers nga sobra maningil, gibutyag ni Kag. Lagare nga kung maplastar na ang tanan sa sektor sa transportasyon, hugot ng ipatuman ang istriktong pagpanakop sa mga mulapas.
