GENERAL SANTOS CITY – Gibalik pinaagi sa Bombo Radyo GenSan ang cash, cheke og mga dokomento nga gipanag-iyahan sa Golden State College ning syudad.
Silang Ligaya Villanueva og Monalisa Asuncion nga taga Bula ning syudad ang nag-uli sa maong kwarta og mga dokomento sa sibyahan.
Sa pamahayag ni Ligaya nga samtang nagbihaye sa iyang traysikad kaganihang nakit-an niini ang brown envelop sa dalan sa GenSanville nga iyang gipulot.
Nakuratan ang nasampit sa dihang nakit-an nga dili lang mga dokomento apan may kwarta.
Tungod niini miadto si Ligaya sa iyang igsoon nga si Monalisa og nagdesisyon nga ibalik pinaagi sa Bombo Radyo.
Nasayran nga anaa sa P105,000 ang cash samtang kapin sa P200,000 ang kantidad og cheke.
Gibutyag sa duruha nga wala nila giinteresan ang maong kwarta bisag nakasinati karon og kalisod.
Ang Golden State College ang nagpasalamat sa nagbalik sa ilang kwarta.
Matud pa ni Ralph Manilay nga talagsaon ang gihimo sa managsoon butang nga ilang gidayeg.
Nasayran nga gihatagan usab og cash isip pahalipay sa Golden State College ang magsuon.
