GENERAL SANTOS CITY – Nagpabiling gawasnon ang suspek nga nagpuyo didto sa duha ka ektarya nga marijuana plantation nga gisulod sa taga-Philippine Drug Enforcement Agency Region 12 sa Sitio Malalag, Brgy. Napnapon, Palimbang, Sultan Kudarat.
Kini human sa gipahigayong marijuana eradication sa mga operatiba kaniadtong Lunes, Nobyembre 6.
Matud ni PDEA-12 Regional Director Gil Castro sa pakighinabi sa Bombo Radyo, nakakumpiska sila ug 500 ka mga naibot na nga marijuana nga nagkantidad ug P100,000, ug nangibot usab sila ug laing 4,500 ka mga fully grown nga tanom nga nagkantidad ug P900,000, nga gilayon nilang gipangsunog.
Apan naka-ikyas ang suspek nga giila lamang nga si Alias Motmot Sakay, human nakamatikod sa presensya sa mga otoridad.
Kahinumduman nga sa miaging Biyernes, laing marijuana plantation ang gisulod sa taga-PDEA-12 sa Arakan, Cotabato, kung asa mukabat sa P400,000 sa tanum nga marijuana ang ilang gipang-ibot ug gisunog.
Nasikop nila ang cultivator nga si Jerome Tulosan nga kasamtangan nang nakasuhan ug pagsupak sa Section 16 o Cultivation of Plants Classified as Dangerous Drugs sa Article II sa RA 9165 kon Comprehensive Dangerous Drugs Act of 2002, nga maon usay ipasang-at nga kaso sa naka-ikas nga suspek sa Sultan Kudarat.
