Nasakmit sa Bureau of Customs (BOC) ang P1.4 bilyones nga kantidad sa smuggled luxury cars gikan sa mga bodega sa Pasay ug Parañaque City.
Apil sa nasakmit niadtong Pebrero 13 mao ang nagkalain-laing mahalong tatak sa sakyanan ug uban pang mga sports car.
Matod sa BOC, ilang gisubay ang mga sakyanan human makadawat og impormasyon nga gibaligya kini online. Gisusi dayon nila ang tip ug gihimo ang operasyon.
Si BOC Commissioner Bien Rubio niingon nga usa kini ka pasidaan sa mga importer nga dili luwas ang ilang mga produkto bisan pa sa paggawas sa mga pantalan.
Ang tag-iya sa mga bodega gihatagan ug 15 ka adlaw sa pagsumiter og dokumento nga nagpamatuod sa hustong pagbayad sa buhis ug taripa. Kung dili, mag-atubang sila og kaso ubos sa Customs Modernization and Tariff Act.
