Nipasalig ang Overseas Workers Welfare Administration sa kaluwasan sa pipila ka mga Filipino government officials nga na-stranded sa Israel luyo sa nahitabong tensyon tali sa Israel ug Iran.
Sumala sa Overseas Workers Welfare Administration, adunay 17 ka mga opisyal nga anaa karon sa luwas nga dangpanan sa Israel.
Sila naglangkob sa siyam ka mayor, upat ka bise mayor, duha ka party-list representative ug duha ka regional director.
Nasayran nga nisalmot sila sa usa ka short course sa Israel ug nakatakdang mobalik sa Pilipinas sa miaging semana.
Sa usa ka pamahayag, si OWWA Administrator Patricia Caunan miingon nga ang DFA, sa pakigtambayayong sa ubang mga ahensya sa gobyerno, nagpadayon sa paghatag og hinabang sa mga stranded nga Filipino nga opisyal sa nasud.
Nanghinaot ang opisyal nga makabalik na sila sa Pilipinas sa umaabot nga mga adlaw.
