Gihangyo sa panel of prosecutors sa Senate Impeachment Court nga ipatawag isip mga testigo sa impeachment trial ni Vice President Sara Duterte si Office of the Vice President Chief of Staff Zuleika Lopez ug National Bureau of Investigation (NBI) Director Melvin Matibag.
Kalabot niini, mihangyo ang prosekusyon nga magpagawas ang impeachment court og subpoena ad testificandum batok kang Lopez ug Matibag aron motambong ug motestigo sa korte sa Hulyo 13 hangtod 15, alas-2:00 sa hapon.
Sumala sa prosekusyon, ang testimonya sa duha ka opisyal importante, may kalabutan ug gikinahanglan aron mapalig-on ang mga alegasyon ilawom sa Article IV sa Articles of Impeachment batok sa bise presidente.
Nakasentro ang maong artikulo sa giingong grave threats ug plano sa pagpasipala sa kinabuhi ni Presidente Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
Hinumdoman nga kaniadto gimandoan nga prisohon si Zuleika Lopez human siya ma-cite in contempt sa House of Representatives tungod sa giingong dili angay nga pagpanghilabot sa imbestigasyon sa komite kabahin sa confidential funds sa mga opisina nga gidumala ni Vice President Duterte.
