Gikondena ni kanhi Presidente Rodrigo Duterte ang pamaagi ug pwersa sa pulis nga gigamit dihang gi-serve ang warrants of arrest batok kang Kingdom of Jesus Christ leader Pastor Apollo Quiboloy ug uban pa nga mga kaubanan niini sa Davao City.
Sumala sa kanhi presidente, sobra-sobra ug dili kinahanglanon ang pwersa sa otoridad nga dili usab gani taga-Davao.
Nahitabo pa kini sumala sa iyaha sa simbahan ug sa school premises — butang nga iyang gihulagway dili gyud niya madawan.
“I strongly condemn the use of excessive and unnecessary force in serving the warrant of arrest for Pastor Apollo C. Quiboloy of the Kingdom of Jesus Christ by police officers who are not even from Davao City. This incident occurred within a place of worship and on school premises, which is absolutely unacceptable,” sumala kang Duterte.
Gitawag usab niini nga “overkill” ang nahitabo ug gikwestyon kun mao ba kini ang mahimong paagi sa Marcos administration sa pagtratar sa mga indibidwal nga giakusahan pa lamang sa krimen ug wala pa gani napamatud-an kun guilty sa kaso.
Gikwestyon usab ni Duterte kun paunsa magarantiya sa administrasyon nga mapabilin ang tawhanong katungod sa mga Pilipino kun ang pinaka-importante gani sa maong mga katungod ang ginatapak-tapakan lamang ug ginalapas sa otoridad.
“Will this overkill be the trademark of this administration when dealing with individuals who are merely accused of committing a crime and have not been proven guilty beyond reasonable doubt?
Will they exhibit the same lack of self-restraint they have shown towards critics of this administration when dealing with their supporters?,” dugang sa statement.
Kagahapon, Hunyo 10, dihang gisulod sa gibanabanaang 100 ka mga pulis sa pagpanguna sa armado nga mga operatiba sa Special Action Force ug Criminal Investigation and Detection Group ang mga propiedad ni Quiboloy apan napakyas sila nga maaresto ang self-proclaimed Appointed Son of God ug ang iyang kaubanan.
Ang mga compound nga gisulod ang nahimutang sa Davao City, Samal Island, ug Sarangani.
Nahimong taas ang tensyon pasado alas 3:00 sa sayo sa kaadlawon dihang migamit na ang raiding team ug hagdanan ug gisaka ang pader sa main compound sa Kingdom of Jesus Christ sa Diversion Road sa Davao City.
Gibutyag nga nagpahigayon pa ug body search sa mga tawo nga anaa sa sulod sa compound.
Duha usab ka helicopters nga ginatuohan nga may sakay nga mga pulis ang naglibot-libot sa ibabaw sa compound samtang padayon ang raid apan wala usab nakatugpa tungod sa obstructions nga gipangbutang sa area lakip na ang mga sakyanan.
Ginaalegar nga adunay mga workers usab sa simbahan nga nasamaran dungan sa raid ug karon naga-andam na ug legal action batok sa nag-raid.
Kahibaluan nga wanted si Quiboloy tungod sa mga kaso nga child abuse, sexual abuse ug qualified trafficking nga na-file sa korte sa Davao ug Pasig.
