Nakatakdang ipresentar sa House prosecution panel ang ilang sunod nga testigo karong adlawa alang sa pagpadayon sa impeachment trial batok kang Bise Presidente Sara Duterte, kalabot sa imbestigasyon sa National Bureau of Investigation sa giingong hulga batok sa kinabuhi ni Presidente Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
Sumala kang House prosecution spokesperson ug Lanao del Sur Representative Zia Alonto Adiong, motestigo si Atty. Jeremy Lotoc, regional director sa NBI-Bangsamoro Autonomous Region in Muslim Mindanao.
Matud ni Adiong, ipresentar ni Lotoc ang resulta sa imbestigasyon nga gihimo sa NBI bahin sa maong insidente.
Ang testimonya ni Lotoc gilauman nga mopadayon sa naunang testimonya ni NBI Senior Agent John Mark Calilung, nga nagpamatuod sa pagka-authentic sa mga video recording ug digital files nga may kalabotan sa pahayag ni Duterte niadtong Nobyembre 23, 2024.
Sa maong video, giingong mipahayag ang Bise Presidente nga adunay siyay gikontrata nga tawo aron patyon sila Presidente Marcos Jr., First Lady Araneta-Marcos, ug kanhi House Speaker Romualdez kon adunay mahitabo kaniya.
Dugang ni Adiong, si Lotoc ang mopasabot sa resulta sa imbestigasyon sa NBI may kalabotan sa giingong hulga, apan midumili siya sa paghatag og dugang detalye tungod sa sub judice rule.
Gipasagdan sa House prosecution panel ang Senado sa pagdumala sa pagpaminaw sa testimonya ni Lotoc isip kabahin sa padayon nga presentasyon sa ebidensiya batok kang VP Duterte.
Ang impeachment case nagpunting sa giingong grave threats nga nalambigit sa pahayag sa Bise Presidente atol sa usa ka online press briefing niadtong Nobyembre 23, 2024.
