GENSAN- Gibutyag ni Paulito Maquilang, ang Slaughterhouse Master II, nga nagpagawas na og closure order ang National Meat Inspection Service (NMIS) batok sa General Santos City Slaughterhouse tungod sa kadaan ug kadaot sa kasamtangang gambalay nga natukod pa niadtong tuig 1978.
Gumikan niini, temporaryong gihangyo sa kagamhanan ang NMIS nga tugotan una sila nga magpadayon sa operasyon samtang gihulat ang pag-retrofit sa bag-ong pasilidad didto sa Barangay Sinawal.
Kining maong lakang gihimo aron matabangan ang mga lokal nga negosyante og karne nga dili mapugos sa pagbalhin ngadto sa mga pribadong ihawan nga mas mahal og singil.
Sa pagkakaron, gigahin na sa dakbayan ang pundo nga mokabat sa P5 ka milyon alang sa maong pag-retrofit sa “Double A” standard nga pasilidad sa Sinawal.
Kahibaloan nga nadugay ang pag-operate niini kaniadto tungod sa rason nga land conflict, apan aduna na silay go-signal karon nga ipadayon ang proyekto.
Gilauman nga kini nga solusyon makahatag og mas hapsay ug moderno nga ihawan nga makatabang sa pagpalambo sa lokal nga patigayon sa karne sa tibuok siyudad
