GENSAN- Gipahayag sa PNP Anti-Cybercrime Group nga padayon gihapon ang presensya sa online scam bisan pa og adunay pagkunhod sa mga natala nga kaso sa cybercrime sa milabay nga mga tuig.
Matud ni P/Maj. Mark Gerard Norbe, operation officer sa RACU 12 ang pag-uswag sa teknolohiya ug kadaghan sa mga tawo nga konektado sa internet maoy usa sa hinungdan nga padayon gihapon nga adunay mabiktima sa mga scammer.
Sumala kaniya, nakatabang ang mga balaod nga gipasa sa nasud sa pagpanalipod sa katawhan ug sa pagpalig-on sa imbestigasyon sa mga kaso may kalabotan sa cybercrime.
Gipadayag usab ni Norbe ang kamahinungdanon sa pagpang-edukar sa publiko aron malikayan ang pagpanglimbong online, lakip na ang pag-ila sa mga peke nga impormasyon ug dili pagpakaylap sa mga unverified nga post.
Gihangyo niya ang publiko nga i-report ngadto sa ilang opisina o pinaagi sa ilang opisyal nga social media page ang mga hulga, sama sa mga post nga makapahadlok o mahimong hinungdan sa kalisang sa mga eskwelahan ug pampublikong lugar.
Matud pa ni Norbe, gikinahanglan ang pagtinabangay sa tanang sektor isip usa ka “whole-of-nation approach” aron epektibong matubag ang cybercrime ug uban pang hulga nga may kalabotan sa online platforms.
