‘On time’ nga pagpagawas sa mga Balikbayan boxes gikan sa mga pantalan, gisiguro sa gobyerno

Nipagsalig ang gobyerno sa publiko nga ang Bureau of Customs (BOC) moproseso dayon sa mga Balikbayan boxes, sa higayon nga makadunggo na kini sa mga pantalan sa nasod.

Kini ang pamahayag ni Finance Secretary Ralph Recto atubangan sa gipaabot nga pagsaka sa trapiko sa mga kargamento nga mosulod sa nasod, samtang nagkaduol na ang Pasko.

Matod sa kalihim sa pagkakaron, wala silay nasinating problema sa mga pantalan.

Kon aduna man, matod niya, ila dayon kining hisgotan, uban sa mga opisyal sa Bureau of Customs (BOC), aron matubag kini.

Dugang pa ni Recto nga ang DOF ug BOC mosigurado nga walay problema sa ilang habig, ug ang mga package sa publiko mobiya sa mga pantalan sa saktong oras, aron ang mga Pilipino malipay sa Pasko.