Nagpahibalo ang bag-ong gitudlo nga Ombudsman nga si Jesus Crispin ‘Boying’ Remulla, nga himuon niyang abli sa publiko ang Statement of Assets, Liabilities, and Net Worth o SALN sa mga opisyal sa gobyerno.
Sa iyang unang adlaw isip ikapitong Ombudsman, iyang gipahibawo nga mohimo siya og bag-ong polisiya aron adunay ‘access’ ang katawhan sa nahisgutang dokumento.
Matod niya nga sunod semana, plano niya nga moluwat dayon og memorandum aron maporma ang mga lagda sa pagpangayo og kopya sa dokumento.
Apan matod niini nga sa pagpahibalo niini, gikonsiderar pa ang mga implikasyon o epekto niini ilabi na sa seguridad sa nasud aron dili kini magamit o ma-armas.
Sa laing bahin, gipaambit ni Ombudsman Boying Remulla nga nagplano siya nga balikon ang isyu kalabot sa eskandalo sa Pharmally.
Paambit niya nga ang nasangpit nga kaso i-review ug balikan sa panahon sa miaging pandemya sa nasud.
Dugang pa nga hatagan og pagtagad ang maong isyu kay morag nakalimtan ug nalubong na sa kalimot ang isyu sa Pharmally. Nagtuo siya nga dili kini angay kalimtan ug angayan lang nga balikon kini aron maklaro ug matino ang hingpit nga kamatuoran.
Kahinumduman nga sa miaging hearing sa Senate Blue Ribbon Committee, gituki ang isyu kalabot sa binilyon nga pundo nga gipalit sa Department of Health alang sa overprice nga medical supplies atol sa kataas sa pandemya.
Samtang giangkon ni Ombudsman Remulla nga dili siya kapamilyar sa nasangpit nga isyu tungod kay wala matud pa niya kini gitutokan pag-ayo.
Hinuon iyang gipasalig nga walay mabiyaan bisan unsa pa nga posisyon ang mapamatud-ang responsable sa kontrobersiya. Matod niya nga ang basehan niini mao ang ebidensya nga makapakita o makapamatuod sa kalambigitan sa opisyal.
