Gipamahayag ni Ombudsman Jesus Crispin “Boying” Remulla niadtong Huwebes, Oktubre 16 nga wala siya masurprisa nga ang magtiayong contractor, Pacifico “Curlee” ug Sarah Discaya, nagdumili sa pagkooperar sa imbestigasyon sa Independent Commission on Infrastructure (ICI).Online streaming packages
Kini human si ICI Commissioner Rogelio Singson una nang niingon nga walay bisan usa sa mga indibidwal nga ni-atubang karon sa komisyon ang kuwalipikado nga mahimong state witness.
Matod ni Remulla nga pipila lang ka impormasyon ang gihatag sa mga Discaya tungod kay posibleng maprotektahan nila ang pipila ka mga dagkong tawo nga nalambigit sa kaso sama ni Sen. Christopher Lawrence “Bong” Tesoro Go.
Gitumbok sa Ombudsman ang joint ventures nga gisudlan sa firm sa Discayas, St. Gerrard Construction, ug CLTG Builders, usa ka contractor nga gidumala sa amahan ug igsuon ni Senador Bong Go sa walo ka proyekto nga nagkantidad og P800 milyones.
Kini nga joint ventures nahitabo sugod niadtong 2017, sa panahon nga si Go nagsilbi isip Special Assistant ni kanhi Presidente Rodrigo Duterte.
Ang nasangpit nga isyu gipasaka atol sa state witness evaluation sa Discayas ug case buildup nga gihimo sa Department of Justice.
Ang Office of the Ombudsman nakig-alayon na sa Department of Public Works and Highways (DPWH) labot sa imbestigasyon sa maong butang.
Apan gawas kang Go, nagtuo si Remulla nga mahimo sab nga protektahan sa mga Discaya si Senador Mark Villar, kinsa nagsilbi isip DPWH Secretary niadtong 2016 hangtod 2021 ug ang inahan niini nga si Cynthia Villar.
Gitan-aw usab sa Office of the Ombudsman ang mga proyekto nga napunta sa igsuon ni kanhi Senador Bong Revilla.
Apan gawas sa nahisgutang mga indibiduwal, aduna pay laing mga politiko, kansang mga ngalan wala pa ibutyag, nga posibleng nakadawat usab og kickback.
Gawas sa mga Discaya, nagtuo usab si Remulla nga gipanalipdan usab ni kanhi DPWH Undersecretary Roberto Bernardo ang pipila ka mga tawo.
Samtang, gihimakak ni Remulla ang pangangkon ni Bise Presidente Sara Duterte nga ang nagpadayong imbestigasyon nakatutok lang sa mga indibidwal gikan sa Duterte administration.
