Gikumpirma sa Office of the Ombudsman nga ilang gimandoan si kanhi House of Representatives Speaker Martin Romualdez nga motubag sa mga reklamong giatubang niini may kalabotan sa korapsyon.
Sa mensahe nga gipadala ni Assistant Ombudsman Atty. Mico Clavano, iyang giingon nga nagpagula na og mando ang preliminary investigation team sa Ombudsman ngadto sa kanhing lider sa Kamara ug sa iyang mga kaubang respondent.
Gimando sila nga mosumiter og counter-affidavits isip tubag ug depensa batok sa mga reklamong gisang-at batok kanila.
Karon anaa na sa preliminary investigation stage ang mga reklamong giatubang sa maong magbabalaod sama sa plunder, graft, ug money laundering.
May kalabotan kini sa pagkalambigit ni Leyte 4th District Rep. Martin Romualdez sa isyu sa korapsyon, ilabina sa giingong anomalya sa mga flood control projects sa gobyerno.
Ang kumpirmasyon sa Ombudsman nahitabo human ipahibalo ni Pangulong Ferdinand “Bongbong” Marcos Jr. ang pagsang-at sa daghang kaso sa Ombudsman batok kang Rep. Romualdez.
Bisan pa nga sakit kini alang sa Pangulo tungod kay iyang ig-agaw si Romualdez, iyang gipasalig nga ang pagka-lider sa nasud dili para sa pamilya ug mga higala, kondili alang sa pagserbisyo sa Pilipinas.
Sumala pa kang Assistant Ombudsman Mico Clavano, base sa dokumento nga gipagawas sa Ombudsman, gihatagan og 15 ka adlaw gikan sa ilang pagkadawat sa mando ang kanhing House Speaker ug ang iyang mga kaubang respondent aron mosumiter sa ilang mga kontra-salaysay.
Matud niya, sa higayon nga makapasa na ang mga respondent sa ilang tagsa-tagsa ka counter-affidavits, ang mga reklamo ipailalom na sa “submitted for resolution” nga hugna.
Apan sa usa ka press conference sa Ombudsman, gipatin-aw ni Spokesperson Clavano nga ang mga reklamong plunder, money laundering, ug uban pa batok kang kanhi House Speaker Romualdez wala magpasabot nga awtomatiko na kining guilty sa mga kaso.
Iyang gipasabot nga ang preliminary investigation stage sa Ombudsman usa ka proseso diin susihon ug tukuron sa prosekusyon kung adunay igo nga ebidensya aron mapasaka ug masang-at ang kaso ngadto sa hustong korte.
Si kanhi House Speaker Romualdez giakusahan isip “central figure” sa anomalya sa flood control projects, apan padayon niyang gipanghimakak ang maong mga alegasyon.
