Nagsang-at ang Oman og sugyot nga joint regional management system alang sa Strait of Hormuz aron mapakunhod ang tensyon sa Middle East.
Nasayran nga gisugyot kini sa Oman ngadto sa mga opisyal sa Iran atol sa ilang panagtagbo sa Tehran niadtong miaging semana. Ubos sa maong sugyot, magbayad ang mga shipping company alang sa pagmintinar sa mga kagamitan nga makatabang sa luwas nga paglayag sa mga barko sa maong agianan.
Ubos usab sa panukala, dili adunay eksklusibong kontrol ang Iran sa Strait of Hormuz. Hinunoon, gusto sa Oman nga sundon ang modelo sa Strait of Malacca, diin nagtinabangay ang Indonesia, Malaysia, ug Singapore sa pagdumala sa maong ruta.
Matud pa, ang pondong makolekta mahimong gamiton sa pagmintinar sa navigation equipment, pagpanalipod sa kinaiyahan, ug alang sa search and rescue operations.
Apan, pipila ka mga nasod sa Gulf ang misupak sa plano nga magpahamtang og bayranan sa mga barkong moagi sa Strait of Hormuz.
Samtang, gipatin-aw sa International Maritime Organization (IMO) nga wala pa kini kabahin sa kasamtangang negosasyon ug ang bisan unsang bag-ong sugyot bahin sa shipping routes o traffic management kinahanglan una nga susihon ug aprobahan sa ahensya.
Hinumdoman nga gitukod na sa IMO ang internasyonal nga mga shipping lane sa Strait of Hormuz sukad pa sa 1968, apan wala kini karon magamit tungod sa hulga sa mga Iranian mines.
Samtang, giawhag sa Iran ang mga barko nga mogamit sa rutang mas duol sa ilang katubigan, samtang ang Estados Unidos mitanyag og suporta alang sa mga barkong moagi sa rutang mas duol sa Oman.
