GENERAL SANTOS CITY – Nangayu ug pasaylo sa mga personahe sa Bombo Radyo GenSan ang OIC Chief Of Police sa Malungon Municipal Police Station sa Sarangani Province nga si Sr. Instr. Richard Pabalinas sa wala pagtug-an sa matuod nga kustudiya na nila ang eskapo nga si Junnefer Zabala.
Kahinumduman nga gipanghimakak ni Pabalinas nga nasikop si Zabala human gitawagan ni Bombo Louie Aguilar miaging adlaw apan kagahapon gibawe sa opisyal ang unang pahayag sa pag-ingon nga ila nang gihuptan ang suspek dihang gitawagan siya sa taga Bombo Radyo.
Gibutyag nga Abril 4 pa nasikop didto sa Tacurong City ang nagpangalan ug Joel Zabala sa kaso nga lugos.
Gilayon nga mitunol ug impormasyon ang naasoy nga police station sa buhatan ni Pabalinas ug ila gilayon nga giadtu-an ug didto og nakumpirma nga si Joel Zabala mao ang mi-eskapo nga si Junefer Zabala pinaagi sa pagtan-aw sa mga samad ug piklat nga naangkon ug aron dili makwestyon ang pagtipig nila sa dinakpan samtang gipropseso ang kaso, gitugyan na lamang kini ngadto kanila tungod may kaso nang giatubang ang nahisgutan.
Tungod niini nahilway na sa kaso silang PO1 Rocky Padernal ug PO1 Ruel Mayora.
