GENERAL SANTOS CITY -Nangayo og tabang pinaagi sa Bombo Radyo ang usa ka OFW nga atua sa Jordan gumikan gimaltrato matud pa sa iyang amo.
Giila ang maong pinay nga si Marian Lopez nga taga Glan, Sarangani Province, kinsa ang trabaho mao ang pagbantay og bata sa amo.
Nasayran nga giagi sa maong OFW og chat ngadto sa iyang higala nga taga City Heights ang pagpangayo og tabang human nga matud pa ginapasakitan sa amo nga babaye.
Kini human nga giakusahan ang nasampit nga nangawat ug salapi sa lalaking amo.
Maong ang higala niini, kinsa usa ka caregiver ang mao usab ang nangita og paagi aron makatabang pinaagi sa pagpadangat dinhi sa sibyahanan sa tinuod nga sitwasyon ni Lopez.
Sa pakighinabi sa bombo radyo sa bana nga si Alfredo, gibutyag niini nga nakaabot na kaniya ang impormasyon kalabut sa nadangatan sa iyang asawa, butang nga gahangyo nga siya matabangan.
Gikabutyag sa bana nga napahibalo na ngadto sa agency ang nahitabo sa iyang asawa ug gani nagpromisa nga ibalhin ug laing employer apan hangtud karon pa natigayon.
Una niini, gipamugos sa babayeng amo ni Lopez pati ang anak nga angkunon nga nangawat..
